توثيقى لأحداث محمد محمود 19 نوفمبر 2011 :  Mogahed Salem
----------------------------------
- اللى نزل محمد محمود الأولى "19-نوفمبر-2011" كان نازل لنصرة مصابى الثورة اللى كانوا معتصمين قبلها بأسبوع فى صينية الميدان بسبب عدم أخذ حقوقهم والمعاملة السيئة من مجلس رعاية مصابى الثورة واللى قررها المجلس العسكرى نفسه، واللى الشرطة نزلت فضت اعتصامهم، بعد مفاوضات فاشلة مع عصام شرف، بدعوى وجود مسجلين خطر وسطهم.
وكلنا نزلنا بعد الفض وبعد مشهد رمى جسد شهيد فى الزبالة فى الميدان.

- والاحداث استمرت 6 أيام، نزل فيها معانا الالتراس (أرجل ناس أيامها) وابناء ابواسماعيل وابو اسماعيل نفسه وابوالفتوح (كطبيب).

- ساعتها تم اعلان نزول اطباء الاخوان (وانا سألت أيامها الدكاترة فى المستشفيات الميدانية عن الاخوان وملقتش حد شاف منهم حد!! وقالوا مكنش فيها الا الثوار الغير مسيسين).

- ابو اسماعيل نزل وخطب خطبة حماسية وطلب مننا نمشى ونيجى بعد أسبوع لغاية م يحشد الحشود لاسقاط المجلس العسكرى، واختفى لمدة 3 اسابيع ورجع ظهر فى احداث مجلس الوزرا.

- الاخوان وحزب النور وحمدين (حزب الكرامة) كانو مشغولين فى العرس الديمقراطى (المرحلة الاولى من انتخابات مجلس الشعب ) واللى اتهمونا فيها بأننا بنحاول نفسده (بديع) واننا بلطجية (جريدة الحرية والعدالة).

- ومع ضعف الشرطة فى الاحداث، نزل معاها الجيش وطردنا من الميدان.

- وفى النهاية كان فيه مجموعة ومنهم المصابين والشيخ عماد عفت وازهريين ونوارة نجم وبعض النشطاء، معتصمين عند مجمع التحرير، وبعد فترة نقلوا الاعتصام لمجلس الوزرا لرفض تعيين الجنزورى وبدأت بعدها احداث مجلس الوزرا.

*** ملحوظات على الهامش:
--------------------------------
- سلفيو كوستا كانوا معانا.
- ممدوح حمزة جاب بطاطين للى هيعتصم.
- أسماء محفوظ أعلنت انسحابها من الترشح لمجلس الشعب وانضمت لصفوف الثوار.
- أحمد حرارة فقد عين فى 28يناير واصيبت التانية فى 19 نوفمبر.
- الغاز كان أقوى بكتيييير من غاز يناير 2011.
- 13 حزب سياسى وقعوا على وثيقة المبادئ الدستورية لاعداد الدستور وتأييد المجلس لعسكرى فيما يفعله. وعلى رأسهم الحرية والعدالة (مرسى) والنور (عبدالغفور) والوفد (البدوى) والعدل (النجار) والمصريين الأحرار ورفض وانسحاب حزب الوسط. وبعدها رجوع النجار عن تأييده. وبعدها مليونية الاسلاميين لرفض الوثيقة (وبدأ انشقاق الصف بين الاسلاميين والثوار والاحتكام للعدد)



مفيش دليل ؟؟؟؟؟
 ؟؟؟
 أنا الدليل ..
 أنا الدم اللى سال ع الأرض
 ما استكفِـت ..
 أنا العين اللى صابها الغدر
 و اتصفِّـت ..
 أنا الأم اللى حرقوا فؤادها ع الغالى
 و لبست شال محنِّى بدمه و اتدفِّـت ..

أنا الدليل ..
 أنا المخنوق ب سم الغاز على الكوبرى ..
 أنا المضروب ب مِية خرطوش على ضهرى ..
 أنا اللى العمر راح محنة ورا محنة ..
 و قلت شاريكى ولا مرة نفَد صبرى ..

أنا المجنى عليه و اليوم بقيت جانى ..
 واللى قتلنى برئ و عيونه ناكرانى ..
 خرجوا الديابة من القفص أحرااااار ...
 و انا اللى لسه سجين محبوس ف أكفانى ..

يا نكسة كات ف التاريخ و اليوم بقِت وكسة ..
 يا قلوب و متلونة بالغدر و الخِســة ..
 لو كنتوا فاكرين حلمنا ممكن يموت ..
 متفرحووووووووووش ..
 نـــار القصاص و الدم هيتشتعل لســه
 

 

اهم مكتسبات ثورة 25 يناير

اهم مكتسبات ثورة 25 يناير:

- تم اسقاط الدستور الذى حمل فى طياته بنود توريث مصر
- تم حل مجلس الشعب الذى لم يعترض يوما على تشريعات تضر البلد وتعدل دستور يؤله الحاكم ويمهد للتوريث
- تم حل المجالس المحلية التى لم تنفع المحليات يوما، بينما كانت تنفع مصالح اعضاء الحزب الواحد
- تم حل جهاز امن الدولة الذى عاث فى الارض فسادا فى كل الاماكن والمصالح والجامعات والبيوت والمساجد والشرطة والجيش و ...
- تم خلع رئيس لم يأتى يوما الا بالتزوير
- تم حل مجلس الشورى برئيسه الذى كان يتفنن فى فضح اعداء النظام وعمل تسجيلات جنسية للجميع حتى يضمن سكوتهم على مصائب النظام
- تم اقالة وزير الداخلية الذى تزعم تزوير الانتخابات واهانة كرامة المصرى والغى ان الشرطة فى خدمة الشعب قولا وفعلا
- تم اقالة وزير الخارجية الذى قال بصوت عال "سأقطع رجل اى فلسطينى يدخل الحدود" ثم ناخ كالانثى الخجولة عندما قصفت اسرائيل حدوده وقتلت طفلة بعد كلامه بأيام
- تم سريان دماء الانتماء وحب الوطن فى جسد جيل كامل كان يتمنى الخروج من البلد بلا عودة
- تم فضح الاستيلاء على اراضى الدولة والغاز المصرى والبترول المصرى بأبخس الاسعار على حساب المواطن الفقير الذى لا يهمه الا ان يطعم ابناؤه بالحلال

والله الموفق والمستعان

بصراحة كده الميدان رجع تانى زى زمان

بصراحة كده ومن غير مستندات ده رأيى الشخصى بعد يوم قضيته فى الميدان،

فى النهار: الميدان عامل زى عزبة الصفيح، مجموعة من الثوار ونيو لوك، اللجان الشعبية على البوابات وبعد ساعة كلام مع كتير منهم، جالى احساس ان دول مش الثوار لكن موظفين وكل مجموعة ليها ريس بيشخط فيها واحيانا بيهدد بمد ايه على اللى يتدلع فى حماية لجنته، وسألت واحد قاللى انا من اسكندرية وجيت من 25 يوم بعد ما كان عندى سنترال واتقفل فى اسكندرية، طيب بتصرف منين وازاى وانت موجود فى الميدان خمسة وعشرين يوم ولما كان قاعد على السور جه واحد اكبر منه فى السن وقاله اقف وانت بتستقبل الناس وعيب الناس ييجو يلاقوك قاعد على السور بالمنظر ده!! والغريب انه احس بالتقصير ومكملش كلامه معايا ونزل فورا ورجع مع زمايله فى اللجنة، ما علينا من كده،

على المغرب وبعد ما صليت فى مسجد عمر مكرم، وانا محبط من حال الميدان اللى حسيت انه متماسك باللجان الشعبية ومفيش ثوار جوة، فقررت اتغدى وامشى ومارجعش تانى، قصره، رحت اتغدى فى هارديز، ووأنا بتابع تويتر: قريت تويتة مش فاكر من مين، ان فيه اجتماع للثوار الساعة تمانية ونص يعنى بعد نص ساعة، المهم قلت أآيس واستنى وأشوف، المهم خرجت تانى وسمعت اصوات فى وسط الميدان وكانت اغانى وفجأة لقيت منصة وقدامها اعداد كبيرة من ... من الثوار اللى كانو وحشونى قوى وكان هاين عليا آخدهم واحد واحد بالحض، وحشتونى يا اخوانى وحشتونى قوى والله، وشوية ولقيت المذيعة المشهورة هالة فهمى موجودة على المنصة وتنويه من واحد على المنصة ان بعد شوية هيقولو بيان الثوار الاول وعلشان مرغيش كتر وازهقك، الخبر الحلو ان بقى فيه مركز اعلامى للميدان، وان القنوات الفضائية هيسمح لها أخيرا تخش الميدان بس بتصريح من المركز الاعلامى وهيكون معاها فى زيارتها مندوب من المركز علشان يتأكد من نقل صورة حقيقية عن الميدان والثوار، حلو قوى، وكمان عملو اتحاد ثوار مصر فى كل الميادين، جميل وهو ده اللى كنا عاوزينه اتحاد يتكلم عننا علشان الناس تعرف مطالبنا الحقيقية وتوجهاتنا، احنا الثوار المستقلين اللى مش فى أى حزب او قوة سياسية، وأول بيان عن جمعة الشرعية 29 يوليو كان اننا مش هنرد على اى اعتداء علينا مهما حصل، والله تستاهلو بوسة، المهم البيت كالعادة، تعالى روحنا البيت، هو انا السواق؟؟ بصراحة ومن غير فنجرة بق (زى الفنجرى أبو صباع) آه رحت اخدتهم من النادى وروحتهم البيت ، ولكن كلمتهم تانى عن الميدان بفخر وعزة واشمئناط.
والله الموفق
ميدان التحرير أمس: ومظاهرات لنصرة ثوار التحرير بعد موقعة العباسية

سياسة بالبلدى كده

سياسة بالبلدى كده
فكرة هذه الصفحة (صفحة على الفيسبوك) جاءتنى بعد ثورة 25 يناير 2011 (والتى لم تنتهى بعد) وحين أطلت علينا النخب من خلال شاشات الفضائيات وما أتت به معها من المصطلحات السياسية والتى، فى رأيى، تقال حتى نشهد للقائل بأنه مثقف ومن النخب، فأجد من يحارب العلمانية ومن يتحلى بالديموقراطية، ومن يخيفنا من الدولة الدينية، ومن يطالب بالدولة المدنية، ومن حين يتكلم تحس أنه برجماتى.

وبعد سماعى لهذه المصطلحات، نزلت الى المكتبات لفك طلاسم هذه اللغة الجديدة ولكنى وجدت اننى يجب ان أقرأ العشرات من الكتب حتى أفهم بعض من هذه المصطلحات، ماشى... وماله... وربنا يباركلنا فى الوقت والنظر ويصبرنا.
لكن ماذا عن حبايبنا فى الشارع؟ واالى قاللى ان ثراء وزراء ورجال اعمال مبارك هو "ربا فاحش" مش زى ماانا قلت "ثراء فاحش".
وجدت ان المواضيع عندهم متلخبطة وأى كلمة كبيرة بتبقى عاملة زى الشتيمة زى يا علمانى ويا برجوازى وغيره من الشتائم.

وهنا فكرت فى البدأ فى كتابة قاموس باللغة العامية يفك طلاسم النخبة اللى بيطلعولنا على الشاشات بشكل يومى وبيدخلو البيوت والمحلات والدكاكين من غير استأذان وبيحصرونا على جهلنا السياسى.

من النهاردة مفيش جاهل سياسى، أنا الجاهل السياسى (مع الاعتذار لاحمد السقا)

واشوفكم بخير يا براجماتيين (يعنى يا بتوع مصلحتكو وبس).

التوقيت الصيفى

من مساوئ التوقيت الصيفى:
1- التأثير السلبى على الساعة البيولوجية للانسان
2- تدمير قواعد البيانات بالكمبيوتر فى حالة التغيير الفورى بدون تعطيلها لمدة ساعة
3- اضطراب المواعيد المخططة مسبقا فى يومى تغيير الساعة

4- من مساوئ استبيان الموافقة او رفض العمل بالتوقيت الصيفى: انه بيغلوش على احداث الفتنة الطائفية اللى بتحصل فى قنا اليوم :(

http://www.idsc.gov.eg/vote.aspx?v=vote

ماذا بعد خطاب الرئيس المتخلى عن منصبه؟

استمعت كما استمع اغلب المصريون الى التسجيل المسجل للرئيس المخلوع.
مبارك مازال مصرا على أنه متنحى، ولكن هنعمل ايه الحق علينا على الاقل فى قانون للخلع، ومفيش قانون التنحى وبالتالى مش هيبقى له حق بعد التنحى انه يشوف ولاده ولا ياخد حقوقه ولا يورث.

مضطر اعترف ان وحدة صف الثورة اصبحت لا تعجبنى ولكن تطمئنى. طيب ازاى؟ يعنى لو اتنين مختلفين فى الايديلوجيات (حلوة الكلمة دى: يعنى افكارهم مختلفة ) لو لاقيتهم سايبين قضية بلدهم وبيتكلمو فى رأيهم فى نتيجة الاستفتاء أو فى الاعتصام فى التحرير، أو فى احتواء الضباط فى المظاهرات او طردهم ، أو فى الدين أو فى الاحزاب أو فى المجلس العسكرى او فى تعيين أو ترشيح مجلس رئاسى، هتلاقيهم بيختلفو وممكن قوى بيتهمو بعض، والنتيجة طبعا هى اضعاف الثورة واللى كان سبب نجاحها هو الوحدة المصرية.

علشان كده لازم ولابد على كل مصرى ان يقفل بقه ..آه.. ومايفتحهوش الا لما يردد "الشعب يريد ..." ونكون كلنا ايد واحدة من تانى علشان خاطر مصر بلدنا الغالية علينا.